Roma duhet patjetër ta parkojë autobusin nëse shpreson ta mposhtë Lionel Messin dhe Barcelonën në takimin e saj çerekfinal të mërkurën mbrëma, sipas Alessio Tacchinardit.

Barcelona do të jetë nikoqir i Romës të mërkurën mbrëma në “Camp Nou” në ndeshjen e parë çerekfinale të Ligës së Kampionëve, transmeton Gazeta Express.

Roma do të kërkojë ta arrijë gjysmëfinalen e parë në garën më prestigjioze evropiane për klube që prej vitit 1984.

Por, Tacchinardi, i cili e ka fituar këtë trofe me Juventusin në sezonin 1995-96, beson se Roma ka pak shpresa për ta arritur gjysmëfinalen kundër një ekipi deri më tani të pamposhtur në Evropë dhe La Liga.

“Roma nuk ka shanse. Barcelona e këtij sezoni është mbase njëra prej më të mirave në 20 vitet e fundit. Madje edhe stoli i tyre është e jashtëzakonshme”, ka thënë Tacchinardi për Omnisport.

“Messi po arrin nivele të jashtëzakonshme përsëri dhe ta ndalesh vetëm atë nuk do të jetë e lehtë. Romës do t’i duhen dy ndeshje të përkryera. Të pëlqeu apo jo, duhet ta parkosh autobusin. Nëse i sulmon dhe iu lejon hapësirë prej 50 metrave, atëherë do të të vrasin”, shtoi ai.