Kryeministrja serbe, Ana Bërnabiq pas takimit të sotëm me presidentin serb, Aleksandar Vuçiq, ka thënë se situata në Kosovë po ashpërsohet edhe më shumë.

Ajo ka theksuar se kurrë nuk e ka parë Vuçiqin më të zhgënjyer me reagimet e partnerëve të huaj në lidhje me ngjarjet e fundit në Kosovë.

“Situata po bëhet më e ashpër. Në fund të vitit të kaluar kam qenë optimiste se do të ketë kompromis, sidomos pas thirrjes për dialog të brendshëm, por ju e patë kur ne dërguam përfaqësues të Zyrës për Kosovë që të flasin për paqe i sulmuan me pushkë”, ka thënë Bërnabiq, transmeton lajmi.net.

Sipas kryeministres serbe, për arrestimin e drejtorit të Zyrës për Kosovë, Marko Gjuriq, Kosova kishte mbështetjen e partnerëve të saj.

“Prishtina kishte mbështetjen e partnerëve të saj të gjithë e dimë se kush janë ata. Të gjithë e dimë se marrëveshja e Brukselit nuk u zbatua. Prilli është përvjetori i pestë i nënshkrimit. Serbia nuk do të heqë dorë nga interesat kombëtare, por është gjithnjë më e vështirë të ruhet paqja, stabiliteti dhe qasja racionale e Serbisë. Ne kemi shpërfillur marrëveshjet e thjeshta”, është shprehur ajo.

Krejt në fund, Bërnabiq ka thënë se Kosova nuk mund të veprojë më si shtet, as në samitin e BE-së në Sofje.