Skuadra më e dobët në La Liga, Malaga është mposhtur mbrëmjen e sotme (e shtunë) nga Barcelona.

Gjiganti katalunas ka siguruar fitore me rezultat 2 me 0 në takimin e zhvilluar në kuadër të xhiros së 28-të duke vazhduar kështu si e pamposhtur deri tani në La Liga, shkruan portali arbresh.info.

Anësori në sulm, Ousmane Dembele është lojtari me notën më të lartë të kësaj ndeshje. Talenti i transferuar gjatë verës nga Borussia Dortmundi është vlerësuar me notën 8.3 për paraqitjen impresive në La Rosaleda.

Te skuadra e Ernesto Valverdes me notë të lartë është vlerësuar edhe Luis Suarez (8.1) që shënoi golin e epërsisë dhe Philippe Coutinho (8.2) që dyfishoi epërsinë me një gol të bukur me thembër.

Lojtari me notën më të dobët është mesfushori i Malagas, Samu Garcia (5.0), i cili u ndëshkua direkt me karton të kuq pas ndërhyrjes së tmerrshme ndaj Jordi Albas./arbresh.info/