Erolld Belegu ka dhënë dorëheqje të parevokueshme nga pozita e kryetarit të Federatës së Basketbollit të Kosovës (FBK).

Këtë dorëheqje ai e ka bërë pasi Agjencia Kundër Korrupsionit ia kishte dërguar opinionin e saj ku thuhet se: “Ushtrimi i funksionit kryetar të FBK-së, krahas ushtrimit të funksionit-Këshilltar i Jashtëm i Kryeministrit të Republikës së Kosovës, është i ndaluar”. Ndërsa kryetari Belegu ka bërë me dije se dëshira e tij është që FBK-ja ta ruajë reputacionin e shkëlqyeshëm që ka në opinionin vendor dhe ndërkombëtar. “Duke dashur ta ruaj reputacionin e shkëlqyeshëm që Federata e Basketbollit të Kosovës e ka në opinionin vendor dhe tek partnerët tanë në FIBA dhe organizmat e tjerë ndërkombëtarë, për të cilin besoj se ekipi i udhëhequr nga unë ka merita të konsiderueshme, si dhe reputacionin tim personal, kam vendosur të tërhiqem nga ky post dhe i lë organet e FBK-së që, sipas Statutit dhe akteve të tjera normative në fuqi, ta procedojnë organizimin e Kuvendit Zgjedhor”, ka thënë ai.

Pas dorëheqjes së Belegut, bordi i FBK-së konform Statutit dhe Rregullores së Punës së Kuvendit e ka caktuar mbledhjen e Kuvendit të Jashtëzakonshëm më 5 prill në Prishtinë. Sipas Statutit të FBK-së, kandidatët për kryetar mund të propozohen nga bordi i Federatës dhe nga shtatë (7) delegatë të Kuvendit, të cilët me deklaratë me shkrim drejtuar Bordit dhe Sekretarit të Përgjithshëm kandidojnë një kandidat për kryetar.