Një dokument sekret ka dalë në dritë sot për mënyrën sesi bëhej kontrabandë në sistemin komunist në Shqipërisë nga Zvicra.

Këtë dokument e ka bërë publik ish kreu i Arkivave në Ministrinë e Brendshme, Kastriot Dervishi, i cili jep edhe të dhëna në lidhje me kontrabandën që bëhej mes ministrisë së Tregtisë dhe trafikantëve që kryesisht ishin italianë.

Statusi

Për herë të parë i bëhet i njohur publikut një dokument i kontrabandës së cigareve (ka dyshime edhe për mallra të tjera) që zhvillonte shteti komunist në hapësirën kohore midis viteve 1966-1991. Aktiviteti fillimisht kryhej nga Ministria e Tregtisë, por më pas kaloi në varësi të Ministrisë së Punëve të Brendshme. Nëpërmjet rrugës tokësore (nga Hani i Hotit), futeshin në Shqipëri kamionë me cigare, të cilat shteti komunist i blinte nga firma zvicerane.

Këto magazinoheshin afër bregut të detit dhe më pas trafikoheshin me anije apo skafe të huaja që vinin në bregdetin tonë. Nga trafikantët e huaj, pjesa më e madhe ishin mafiozë italianë. Qëllimi i tranzitimit të cigares në këtë mënyrë sillte fitim për komunistët e Shqipërisë, si edhe për trafikantët ndërkombëtare pasi e siguronin mallin pa barrierat doganore.

Me organizimin e kësaj pune merrej Dega e Veçantë. Për kohën kur ishte pjesë e Ministrisë së Punëve të Brendshme, ajo ishte fillimisht në varësi të Degës së 2-të të Drejtorisë së Parë të Sigurimit të Shtetit.

Më pas ajo kaloi në Drejtorinë e Tretë të Sigurimit të Shtetit (Zbulimi Politik) dhe në fund u quajt Seksioni i 2-të i Repartit 100/5. Dokumenti bashkëlidhur është i nënshkruar nga shefi i Degës së Veçantë “Antonio”. Është një dokument që nuk bën fjalë vetëm për cigare.