Sapo ka filluar një vit i ri, dhe shumica e njerëzve synojnë ta ndryshojnë veten për mirë. Fundja fundit, pikërisht për këtë arsye ka filluar edhe tradita e vënies së synimeve për Vitin e Ri – për ta përmirësuar jetën tonë në fushat ku kemi mangësi.

Por në realitet është shumë e vështirë t’i mbajmë ato premtime. Në fakt, sipas statistikave, 80 për qind prej nesh dështojmë në synimet tona qysh në javën e dytë të muajit shkurt, transmeton Telegrafi.

Një studim i vitit 2016, i publikuar në revistën ‘Personality and Social Psychology Bulletin’, e ka hulumtuar fenomenin e vënies së synimeve për vitin e ri, dhe ka zbuluar se 55 për qind e atyre synimeve ndërlidhen me shëndetin – siç është fillimi i ushtrimeve fizike, apo ngrënia e ushqimeve të shëndetshme – dhe 20 për qind prej tyre kanë të bëjnë me larjen e borxheve.

Studimi, i udhëhequr nga Kaitlin Woolley dhe Ayelet Fishbach, kishte zbuluar se pjesëmarrësit e studimit kishin besuar se kënaqësia dhe rëndësia janë faktorë të rëndësishëm sa i përket mbajtjes së atyre premtimeve.

Në fakt, hulumtuesit kanë zbuluar se faktori i kënaqësisë është gjëja e vetme që ka rëndësi në mbajtjen e premtimeve të tilla.

Me fjalë të tjera, nëse pjesëmarrësit po ‘shpërbleheshin’ menjëherë nga shprehitë e tyre të reja, shanset për t’iu qëndruar premtimeve besnikë, kishin qenë mjaft të mëdha. /Telegrafi/