“Trepça ’89 ma ka bërë ofertën, por kam edhe dy oferta në Superiore”.

Kështu deklaronte sot për Sport Ekspres Armando Cungu, i cili nuk i ka dhënë përgjigje pozitive klubit nga Kosova.

Arsyeja është e thjeshtë, ish-trajneri i Vllaznisë dëshiron të qëndrojë në Superiore, ku cilësia dhe vitrina është në një nivel më të lartë.

Përveç kësaj, trajneri shkodran kërkon të qëndrojë pranë familjes dhe në këtë aspekt aksi Tiranë-Shkodër është ai që i leverdis më shumë.

Duke ecur me rregullin e përjashtimit, vetëm Partizani është klubi që në këtë moment mund të afrojë Cungun, duke parë që edhe financiarisht, edhe në cilësi e ambicie, është klubi i vetëm që mund të bindë Cungun.

Në të shkuarën Partizani e ka diskutuar mundësinë e punësimit të trajnerit shkodran, i cili ka punuar me Starovën edhe në Kukës dhe e njeh mirë.

Edhe Starova, fjala e të cilit peshon shumë, është dakord për Cungun, ndaj nuk është çudi që në ditët në vazhdim të zhvillohet një bisedë serioze dhe këtë radhë Cungu zor se do të refuzojë.