Ambasadorja e SHBA-ve në OKB, Nikki Haley ka sulmuar Kombet e Bashkuara gjatë një fjalimi sfidues në Asamblenë e Përgjithshme të 193 anëtarëve, para se të miratohej një rezolutë që bën thirrje për t’i dhënë fund embargos ekonomike amerikane në Kubë.

Haley debatin e ka quajtur “teatër politik”, transmeton portali arbresh.info

“Le të jemi të sinqertë për atë që jemi duke e parë këtu”, tha Haley. “Kjo asamble nuk e ka fuqinë për t’i dhënë fund embargos së SHBA-ve. Ajo bazohet në ligjin e SHBA-ve dhe vetëm Kongresi i Shteteve të Bashkuara mund ta ndryshojë atë”.

Shtetet e Bashkuara kanë votuar kundër rezolutës së OKB-së për heqjen e embargos tregtare me Kubën.

Haley tha se Shtetet e Bashkuara kundërshtojnë rezolutën në solidaritet me popullin kuban “ dhe me shpresën se një ditë do të jenë të lirë të zgjedhin fatin e tyre”.

Në lidhje me rastin ajo ka theksuar para anëtarëve të tjerë se OKB-ja “nuk është shefi i SHBA-ve që të marrë vendime”.

Zyrtarët kubanë i kanë quajtur vërejtjet e Haley “të pasjellshme” dhe kanë theksuar se ajo nuk e ka autoritetin moral për të kritikuar kubanët./arbresh.info/