Ministri i Kulturës, Rinisë dhe Sportit, Kujtim Gashi ka thënë se Republika e Kosovës përkundër përmirësimeve në fushën e sigurisë vazhdon të ballafaqohet ende me sfidën e trafikimit me qenie njerëzore.

“Ministria e Kulturës, Rinisë dhe Sportit planifikon çdo vit buxhet për projektet që kanë për qëllim aktivitetet për parandalimin e kësaj dukurie. Kemi ndarë buxhet për 3 projekte këtë vit për këtë dukuri”, është shprehur ministri Gashi gjatë një konference për media me rastin e Ditës së Bashkimit Evropian kundër Trafikimit me Qenie Njerëzore, shkruan arbresh.info.

Ai ka thënë se për të parandaluar këtë dukuri do të bashkëpunojnë institucionet e sigurisë dhe organizata ndërkombëtare.

“Meqë tashmë jemi në fazën e draftimit të planit të rinisë 2018-22 ju siguroj se pjesë e rëndësishme e kësaj strategjie do të jetë lufta kundër kësaj dukurie. Një nga objektivat kryesore do të jetë vetëdijesimi i të rinjve për këtë dukuri”, ka thënë ai.

/arbresh.info/