Kryetari i komunës së Drenasit, Ramiz Lladrovci të hënën ishte sulmuar në Tërstenik teksa po bënte fushatë në këtë fshat.

Një person tashmë është arrestuar nga Policia e Kosovës, deri sa është raportuar se sulmuesi është vëllau i Naim Bazajt, Fitim Bazaj.

Ndërkohë, vet Naim Bazaj, kryetar i Kuvendit Komunal të Drenasit pati deklaruar të martën se Lladrovci ishte kthyer nga Shqipëria për ta përçarë PDK-në dhe se ai e shantazhon presidentin Hashim Thaçi dhe kryeparlamentarin Kadri Veseli me një “çantë të zezë”(siç e ka quajtur Bazaj).

Lidhur me këtë, Lladrovci është deklaruar për “Indeksonline” duke thënë se këto deklarime të Bazajt janë krejt të pavërteta.

“Ato deklarime janë të pavërteta, këtë shpifje e kanë sajuar kundërshtarët e mi politik dhe asgjë s`ka të vërtetë lidhur me këtë çështje”, ka thënë ai.

Ndryshe, Naim Bazaj të mërkurën ishte thirrur në polici për t`u marrë në pyetje rreth deklaratës së tij se ka fakte të shantazhit që Lladrovci i ka bërë Thaçit.

Sa i përket raportit me kreun e PDK-së, Kadri Veselin, ky i fundit pikërisht ditën e martë ka marrë pjesë në fushatën e Drenasit ku i ka ofruar përkrahje të parezervë kandidatit të tij, Ramiz Lladrovci.