Nga vala e të nxehtit intensiv te përmbytjet e rënda; momentalisht Europa është kontinenti i ekstremeve.
Moti i keq ka sjellë shkatërrim në shumë vende. Italia përjetoi një prej sezoneve më të thata në 60 vjet, e sipas meteorologëve, në disa pjesë të vendit totali i reshjeve ka qenë 80 përqind nën vlerat normale.

Në Portugali, mbi një mijë zjarrfikës u mobilizuan për shuarjen e flakëve nëpër pyje në provincat e Castelo Branco dhe Santarem, që detyruan autoritetet të evakuojnë fshatrat e afërt.

Situata të ngjashme pati edhe në Francë, Kroaci e gjithashtu Shqipëri. Për ekspertët, problemi nuk është aq shumë thatësira përgjatë një periudhe kohore, por përsëritja e këtyre fenomeneve. Në Itali, Portugali dhe Francë, reshjet e regjistruara gjatë dimrit ishin 20 deri në 30 përqind më pak se sa mesatarja. Ndërkaq, rritja e temperaturave ka favorizuar avullimin e ujit nga toka.

“Gjatë 150 viteve të fundit, dukuritë ekstreme ishin të rralla, por në 3 dekadat e fundit ne kemi regjistruar gjithnjë e me shumë fenomene të tilla”, tha Omar Baddur, shef i të Dhënave e Monitorimit Klimaterik.

Ekspertët besojnë se shkaku kryesor i kushteve ekstreme janë ndryshimet klimaterike. Sipas tyre, dukuritë ekstreme në Europë do të bëhen diçka normale nëse nuk ndërmerren hapa të menjëhershëm për reduktimin e emetimeve të gazit serrë. Një studim europian sugjeron se gjatë këtij shekulli rreziku i zjarreve në pyjet e kontinentit tonë mund të dyfishohet.