Lumezi takohet me shefen e Agjensionit për kompensimin e viktimave në San Francisko

12:36 | 28 Korrik 2017
M. A.

Kryeprokurori i Shtetit, Aleksandër Lumezi i shoqëruar nga kryeprokurorët e prokurorive të Kosovës, po vazhdojnë vizitën në San Francisko të Shteteve të Bashkuara të Amerikës.

Lumezi atje ka takuar shefen e Agjensionit për kompensimin e viktimave Julie Nauman, ku kanë shkëmbyer përvojat e tyre në fushën e kompensimit të viktimave duke i dhënë një rendësi të veçantë eksperiencës se qytetit të San Franciskos dhe mundësisë se aplikimit të kësaj eksperiencë në Kosovë.

Nauman e ka njoftuar Lumezin me sfidat e kësaj fushe dhe i ka ofruar mbështetje për aplikimin e Ligjit të Kosovës për kompensimin e viktimave të krimit, duke përfshirë trajtimin me profesionalizëm, respektimin e të drejtës në siguri, dinjitet, jetë private dhe familjare të tyre.

Kryeprokurori i Shtetit do të zhvillojë takimet edhe me përfaqësues të institucioneve tjera të drejtësisë në San Francisko, me qëllim të marrjes se përvoja të ndryshme, transmeton Klan Kosova.