Komuna e Klinës i ka detyruar prindërit e kësaj komune që të paguajnë 5 euro më tepër në muaj për dërgimin e fëmijëve të tyre në çerdhe.

Vlera e pagesës për çerdhet është bërë në kundërshtim me rregulloren për tarifa në këtë komunë, shkruan AktivPress.

Zyra Kombëtare e Auditimit thekson se qytetarëve u është dashur të paguajnë nga 25 euro në muaj, e që në fakt pagesa do të duhej të ishte 20 euro në muaj.

“Në të gjitha rastet qytetarët ishin ngarkuar me tarifë mujore nga 25€, për dërgimin e fëmijëve në çerdhe. Kjo vlerë është në kundërshtim me rregulloren për tarifa, e cila përcakton se pagesa duhet të jetë 20€ për muaj. Për vitin 2016, qytetarët kishin paguar në total 13,825€, apo 2,765€ më tepër sesa parashihet me rregulloren e komunës”, thuhet në të gjeturën e auditorit.

Sipas këtij raport, inkasimet e tarifave nga ana e komunës janë bërë pa ndonjë bazë të qartë ligjore, transmeton arbresh.info.

Zyra Kombëtare e Auditimit, rekomandon kryetarin që të shqyrtojë rastin pse kanë ndodhur mbingarkesat e qytetarëve me këto tarifa.

ZKA ka gjetur edhe disa parregullësi të tjera sa i përket artikujve ushqimor në çerdhe dhe institucionet e tjera të komunës.

Sipas auditorit fituesi i tenderit për furnizim me artikuj ushqimore është bërë me çmime jo normalisht të ulëta./arbresh.info/