Mesfushori Jetmir Sefa është zyrtarisht futbollist i skuadrës së Lirisë së Prizrenit, ku trajner është ish-kapiteni i Skënderbeut, Bledi Shkëmbi.

Ky është afrimi i parë i trajnerit Shkëmbi në merkato nga kampionati shqiptar.

Pas aventurës me Kamzën sezonin e shkuar që u kurorëzua me ngjitjen në Kategorinë Superiore, 30 vjeçari do të provojë një eksperiencë të re në kampionatin kosovar. Sefa është një futbollist i shumë shëtitur në kampionatin shqiptar duke ndërruar disa skuadra, por kjo do të jetë aventura e parë jashtë kampionatit shqiptar.

Shkëmbi dhe Sefa kanë qenë shokë skuadre në sezonin 2010-2011 te Skënderbeu, ku u shpallën edhe kampionë. Kamza, Vllaznia, Tirana, Laçi, Kastrioti, Bylisi dhe Skënderbeu janë klubet ku mesfushori është aktivizuar më parë.

Endri Vrapi, Sebino Plaku dhe Erlis Frashëri janë futbollistët e tjerë të preferuar që pritet t’i bashkohen skuadrës së Lirisë në ketë merkato. Të 3 këta futbollistë kanë qenë shokë skuadre me Shkëmbin te Skënderbeun dhe janë njohje të vjetra të ish-kapitenit korçar.