Këshilli Evropian shtoi 14 persona dhe 4 subjekte në listat e atyre që i nënshtrohen një ngrirje të aseteve dhe kufizimeve të udhëtimit, duke transpozuar listat e reja të vendosura nga rezoluta e Këshillit të Sigurimit të OKB-së 2356 (2017).

Kjo rezolutë u miratua më 2 qershor 2017 në përgjigje ndaj aktiviteteve të vazhdueshme të armëve bërthamore dhe veprimtarive të raketave balistike të Republikës Popullore Demokratike të Koresë (DPRK), në shkelje dhe mospërfillje flagrante të rezolutave të mëparshme të Këshillit të Sigurimit të OKB-së.

“Vendimi i Këshillit sjell numrin total të personave nën masa kufizuese kundër DPRK-së për 53 persona dhe 46 subjekte të listuara nga OKB. Përveç kësaj, 41 persona dhe 7 entitete janë caktuar nga BE në mënyrë autonome,” thuhet në komunikatër e Këshillit, shkruan arbresh.info.

BE po zbaton të gjitha rezolutat e Këshillit të Sigurimit të Kombeve të Bashkuara të miratuara si përgjigje ndaj armëve bërthamore të DPRK-së, armët e tjera të shkatërrimit në masë dhe programet e raketave balistike. Përveç kësaj, BE ka imponuar masa autonome kufizuese ndaj DPRK-së, duke plotësuar dhe përforcuar regjimin e sanksioneve të OKB-së.

Aktet ligjore u miratuan me procedurë me shkrim. Ato do të publikohen në Gazetën Zyrtare të 9 qershorit./arbresh.info/