Presidenti Donald Trump nuk do të nxitojë për të marrë një vendim në lidhje me politikën e tij mbi ndryshimin e klimës, tha të enjten sekretari i Shtetit Rex Tillerson, pasi që presidenti deri në fund të majit ka shtyrë vendimin për braktisjen përfundimtare të marrëveshjes së Parisit për klimën.

“Ne në Shtetet e Bashkuara të Amerikës jemi duke shqyrtuar një sërë çështjesh të rëndësishme, sidomos qasjen e administratës Trump ndaj ndryshimeve klimatike”, tha Tillerson para Këshillit Arktik që është mbledhur në Alaskë.

SHBA filloi të kryesojë Këshillin e Arktikut dy vjet më parë, gjatë mandatit të sekretarit të Shtetit John Kerry, një avokat i pasionuar i luftës kundër ngrohjes klimatike, i cili ka kontribuar shumë në marrëveshjen e Parisit, të arritur në fund të vitit 2015.

“Ne e respektojmë pozicionin tuaj dhe ju duhet të dini se ne e konsiderojmë shqetësimin tuaj. Ne nuk do të nxitojnë në një vendim, ne do të punojmë në një vendim të mirë për SHBA-të”, ka thënë Tillerson para përfaqësuesve të vendeve anëtare të Këshillit të Arktikut, Kanadasë , Rusisë, Norvegjisë, Danimarkës, Islandës, Suedisë dhe Finlandës.

Gjatë fushatës, Trump ka premtuar për të shfuqizuar këtë marrëveshje historike shumëpalëshe, por tani ka shtyrë vendimin deri në fund të majit. Ai kah fundi i prillit nënshkroi një dekret me të cilin përcakton rishqyrtimin e kufizimeve të vendosura nga paraardhësi i tij, Barack Obama për eksplorimin dhe shfrytëzimin e naftës dhe gazit, veçanërisht në Arktik.