Punimet për ndërtimin e autostradës drejt Rajonit të Anamoravës, do të nisin më së largu në muajin gusht.
Pas miratimit të vendimit nga ana e Qeverisë për themelimin e Komisionit ndërministror në krye me ministrin e Infrastrukturës, pritet që të shpallet edhe tenderi, raporton KTV.

Për pjesën e parë të autostradës Prishtinë – Gjilan – Dheu i Bardhë në gjatësi prej 22 kilometrash, kjo ministri po planifikon që t’i harxhojë mjetet e ndara nga buxheti i shtetit.

Ndërsa, për pjesën e dytë të ndërtimit të Autostradës prej 30 kilometrash, Ministria do të marrë kredi nga BERZH- i dhe Banka për Investime Evropiane, të cilat kanë shprehur gatishmërinë për ndihmë.

Ndërkaq, në projektin, i cili është hartuar deri në detajin e fundit, autostrada do ta ndërrojë drejtimin.

Ministria është në përfundim edhe të procedurave të elaborimit të shpronësimit.

Pjesa më e madhe e autostradës do të shkojë nëpër toka shoqërore të pabanuara dhe përllogaritjet e para janë se i gjithë projekti do të kushtojë deri në 260 milionë euro.

Ajo do të jetë e gjatë 47.1 kilometra dhe do të lidhë korridorin 6, 7 dhe 10.