Sipas një njoftimi nga EULEX, më 5 qershor një grup prej rreth 20 çiklistësh u nisën në rrugëtimin e tyre në një distancë prej 500 km në të gjitha qytetet e Kosovës, veshur me fanellat ngjyrë verdhë.

Çiklistët u nisën për në Mitrovicë, Pejë, Gjakovë, Prizren, Ferizaj, Gjilan, Kamenicë dhe u kthyen përsëri në Prishtinë në pikën përmbyllëse në Sabaja Bar. Gjatë rrugëtimit edhe disa qytetarë e çiklistë të tjerë iu bashkuan ekipit.

Aktiviteti arriti të sigurojë rreth euro 15,000 përmes kontributeve të kompanive, individëve dhe ankandit e lojërave interesante që u zhvilluan mbrëmë në Sabaja Bar në Prishtinë.

Mark Dixon, çiklistë dhe njëherit njëri nga organizatorët shprehet se edhe këtë vit kjo ngjarje u përmbyll me sukses.

I gjithë ky rrugëtim mbante karakterin humanitar, atë të ngritjes së fondeve për nënat dhe fëmijët.

Me këto fonde të siguruara këtë vit do të mbështeten programet furnizuese për Klinikën e Neonatologjisë në Prishtinë, që ofron kujdes për foshnjet e lindura para kohës.
Kjo ngjarje është nismë e dy çiklistëve ndërkombëtarë (Mark Dixon dhe Thomas Flanagan) që jetojnë në Kosovë dhe u përkrah fuqishëm nga Eulex, Devolli Corporation, Uni Project, Sabaja, studio Drop, Pilot Bike, punonjës ndërkombëtarë dhe miq të shumtë.