KEK e KEDS dikur ankoheshin në njëri-tjetrin, ndërkaq sot janë konfirmuar shkeljet e bëra nga KEDS-i me ndërprerjet e shpeshta të energjisë.

Zyra e Rregullatorit të Energjisë i ka shqiptuar gjobën në vlerë prej 45 mijë euro ndaj KEDS’it, për arsye se kishte aplikuar reduktime të energjisë duke u fshehur mbrapa “ndërprerjeve të planifikuara më qëllim të mirëmbajtjes”.

“Bordi ka konstatuar se Operatori i Sistemit të Shpërndarjes (OSSH) nuk ka arritur të dëshmojë se të gjeturat nga monitorimi i ZRRE-së nuk janë të sakta dhe ka vendosur që duke u bazuar në Rregullën për Masat Administrative dhe Gjobat të shqiptojë dënim me gjobë në vlerë prej dyzet e pesë mijë (45.000) euro”, thuhet në njoftimin e ZRRE-së.

Në janar të këtij viti ishte raportuar për ndërprerje të rrymës, me ç’rast KEDS dhe KEK shkëmbenin akuza për këtë ndërprerje. Disa muaj më pas, erdhi ky dënim ndaj KEDS’it.