Shndërrimi i FSK-së në Ushtri të Kosovës nuk është duke u sfiduar vetëm nga çështjet politike, aspekti financiar është ai që rrezikon ta pamundësoj këtë transformim.

Qeveria e Kosovës, nga buxheti i vitit 2017 ka paraparë që FSK-së i nevojitën vetëm 50 milion euro gjatë këtij viti.

Kjo për deputetin i Vetëvendosjes Rexhep Selimi, është veprimi i parë që e ka pamundësuar krijimin e Ushtrisë së Kosovës, nga vetë Qeveria.

Ndërkaq deklarimet e Presidentit Hashim Thaçi, për vendimin për krijimin e kësaj forcë, Selimi i ka quajtur vetëm një retorike e skenarit për elektorat, duke i hedhur “pataten e nxehtë”, Kryeministrit Isa Mustafa dhe eventualisht në rast dështimi kjo do ti “faturohej” edhe opozitës.
“Me buxhetin që ka ndarë Qeveria e Kosovës për FKS-në nuk ka garanci për rritjen e kapaciteteve por është e kundërta garancia për mos bërjen në ushtri. Edhe sikur krejt infrastruktura ligjore sot të ishte e gatshme për krijimin e ushtrisë, edhe sikur të votohet në amendamentet kushtetuese edhe sikur të votohen ndryshimet për projektligjin për FSK-në, me buxhetin e paraparë i cili është rreth 50 milion për FSK-në, garanton se nuk ka zhvillim të saj”, ka thënë Selimi për Indeksonline.

Sipas tij ky buxhet është përgjysmë më pak se ai i ushtrisë së Malit të Zi, dhe i pa krahasueshëm më ushtritë tjera e kur bëhet fjalë, sidomos me buxhetin që ka paraparë Qeveria e Serbisë për ushtrinë e saj është astronomikisht i pa krahasueshëm.

“Retorika e të ashtuquajturit Presidenti Thaçi në konferencën e sotme ishte thjesht retorikë e skenarit për elektorat. Nuk duhet që me ushtrinë e Kosovës, të bëhet lojë duke ja hedhur topin njëri tjetrit. Thaçi ka pritur që Vetëvendosja ta kundërshtoj këtë nisme dhe pastaj në prag të zgjedhjeve ta përdor këtë si armë kundër VV-së, duke thënë që ata kundërshtuan krijimin e ushtrisë së Kosovës”, ka thënë Selimi.