Zgjedhjet komunale 2017 që do të mbahen në muajin tetor sigurisht se do të sjellin shumë zhvillime dhe ndryshime në vend.

Ndërsa disa muaj para se të ndodhë e gjithë kjo, në njërën ndër komunat ku deri në atë muaj do të qeverisë Lidhja Demokratike e Kosovës, tashmë janë duke u përfolur edhe kandidatët e mundshëm.

Si duket partia që vazhdon të qeverisë ka emra të shumtë të cilët ekziston mundësia që të jenë kandidatë potencial të këtyre zgjedhjeve.

Sipas burimeve të Indekosnline, Ministri i Shëndetësisë, Imet Rrahmani, deputeti Fatmir Rexhepi si dhe Kryetarja e Kuvendit të Gjilanit, Valentina Bunjaku-Rexhepi, janë tre nga emrat e mundshëm që do të kandidojnë në këto zgjedhje nga LDK-ja.

Madje deputeti Fatmir Rexhepi në një prononcim për Indeksonline, ka theksuar se është ende herët për diçka të tillë por që nuk i dihet.

Ky i fundit nuk e ka pohuar apo mohuar se mund të ndodhë që emri i tij të jetë ndër kandidatët potencial.

Përpos faktit që është ende herët ai madje nuk ka kundërshtuar pyetjen se a do të ishte i gatshëm që të udhëhiqte me qytetin e Gjilanit.

“Nuk di ende asgjë sepse nuk është asgjë e vendosur. Nuk e di saktësisht se çfarë flitet pasi është ende herët. Kur të vije koha e zgjedhjeve shohim e bëjmë pasi është ende herët”, ka thënë ky i fundit.

Si kandidat i pavarur i kësaj komune theksohet të jetë Faton Bislimi i cili ishte një ndër kandidatët për komunën e Gjilanit në zgjedhjet e vitit 2013.

Shefi i Grupit Parlamentar të Partisë Demokratikë të Kosovës, Zenun Pajaziti, mbetet njëherë emri i vetëm i mundshëm që do të kandidojë nga radhët e PDK-së, par të parin e Gjilanit.

Ndërsa Rexhep Kadriu nga Aleanca për Ardhmërinë e Kosovës është emri më i përmendur nga radha e kësaj partie si kandidat i mundshëm për zgjedhjet komunale të qytetit të Gjilanit.

Ky i fundit në një prononcim për Indeksonline, nuk ka mohuar mundësinë e kandidimit të tij në zgjedhjet e ardhshme komunale.

“Nëse marrin vendim organet e partisë që të jem unë kandidat i AAK për kryetar të komunës së Gjilanit unë do hy ne garë për të udhëhequr me Gjilanin ne mandatin e ardhshëm 4 vjeçar”, ka thënë Kadriu.

Po ashtu gjithnjë sipas burimeve të Indeksonline, si emër i mundshëm për të kandiduar në Gjilan në zgjedhjet komunale 2017 nga Lëvizja Vetëvendosje është, Besa Baftiu.

Ndryshe  Baftiu është deputete në Kuvendin e Kosovës, nga Lëvizja Vetëvendosje.