Presidentja e Kosovës, Atifete Jahjaga i dërgoi telegram ngushëllimi familjes Lumezi, me rastin e ndarjes nga jeta të mjekut e intelektualit, Engjëll Lumezi.

“Me pikëllim të thellë e mora lajmin për ndarjen nga jeta të dr. Engjëll Lumezit. E ndaj me ju, e nderuara familje, këtë dhimbje të madhe për humbjen e njeriut më të dashur, duke e kujtuar me shumë respekt punën dhe kontributin e çmuar të Dr. Engjëll Lumezit, njërit ndër mjekët e parë shqiptarë në Prizren”, thuhet në telegramin e Presidencës.

“Dr. Engjëll Lumezi do të kujtohet për kontributin e jashtëzakonshëm që ka dhënë si mjek, si ligjërues shumëvjeçar në Fakultetin e Mjekësisë, si bashkëthemelues i Katedrës dhe i Institutit të Fiziologjisë. Ndarja nga jeta e Dr. Lumezit është humbje e madhe jo vetëm për familjen por edhe për miqtë, për bashkëpunëtorët dhe për të gjithë ata studiues që patën fatin të mësojnë nga ai”, thuhet në telegram.