Muja: Partia e Limajt s’mund ta fitojë Drenasin

22:39 | 6 Dhjetor 2016
Trina Galanxhi

Deputeti i PDK-së, Shaip Muja, ka deklaruar se partia e Fatmir Limajt, edhe krejt VLAN-in me rikthye, nuk do të munden të fitojnë në Drenas. Ai ka shtuar se veç vet ka më shumë vota sesa krejt Nisma.

Shaip Muja nga PDK konsideron se opozita në Drenas ka hutuar elektoratin për momentin, por ai elektorat ka me u kthye më 18 dhjetor dhe PDK ka me qenë fituese.

Muja mendon se Presidenti Thaçi nuk është marrë me fushatën e Drenasit, ndërsa për darkën me mësuesit e kësaj komune, Muja thotë se ka qenë në kuadër të aspektit arsimor, e përgatitur para se të fillojë fushata.

“Thaçi mbajti darkë edhe në Kaçanik, ku nuk ka zgjedhje”, thekson Muja.

Muja ka thënë se në garën e Drenasit disa kandidatë kanë bërë deklarata spekulative t’u u thirre në emër të PDK-së e Presidentit Thaçi.

“Thaçi nuk merret me këto deklarata spekulative”, sepse qysh thotë Muja, “këto deklarata janë vogëlsira”.

Muja konsideron se Nisma duhet me u marrë me Malishevën, të cilën e ka marrë me huti, qysh po donë me marrë Drenasin, pa strategji politike apo ekonomike.

Ai ka thënë se në tre vjetet e fundit nën udhëheqjen e Demakut ka pasë pak ngecje në Drenas, për shkak të rrethanave nëpër të cilat ka kaluar ish kryetari Demaku. Pikërisht këtë periudhë, e kanë shfrytëzuar opozita në Drenas.