Përveç grave politikane dhe deputeteve nga Parlamenti i Kosovës dhe Serbisë, në këtë konferencë kanë marrë pjesë edhe ambasadorë të ndryshëm në Kosovë, si dhe pjesëmarrës nga Mali i Zi, Maqedonia dhe Bosnja.

Konferenca kishte për qëllim të shtyjë përpara dialogun në mes të grave dhe komuniteteve të rajonit në përgjithësi, pastaj të identifikojë sfidat në mënyrë që proceset e marrëveshjeve të Brukselit të shkojnë në rrugën e duhur dhe të shërbejnë për të mirën e të gjithë qytetarëve, por edhe rolin e grave në zbatimin e këtyre marrëveshjeve.

Kështu u tha mes tjerash gjatë kësaj konference, në të cilën nga gjithsej 150 pjesëmarrës sa ishte paraparë të marrin pjesë, ishin prezentë më pak se gjysma e tyre.

Ministrja për Dialogun, Edita Tahiri, ka bërë të ditur se qëllimi i këtij takimi është që të rriten sa më shumë hapësirat e dialogimit në mes të grave për proceset paqësore, të sigurisë dhe të një mirëbesimi të përgjithshëm.

Ambasadori norvegjez në Kosovë, Jan Braathu, e ka quajtur takimin të rëndësishëm për marrëdhëniet e rajonit.

Ndërkaq, anëtarja e lobit rajonal të grave nga Serbia, Natasha Miçiq, ka shprehur keqardhje për zhvendosjen e lokacionit të mbajtjes së kësaj konference nga veriu në jug të Mitrovicës që ka ndodhur momentet e fundit.

Ministrja Tahiri në lidhje me këtë tha se nuk i din arsyet e anulimit të takimit në atë pjesë të qytetit, por me të marrë informacionin, ka kontaktuar menjëherë kryetarin e Mitrovicës, Agim Bahtiri, rreth përgatitjes së lokacionit për konferencën./arbresh.info/