Jose Mourinho kërkon angazhim më të madh nga futbollistët e tij, përndryshe do të detyrohet të bëjë ndryshime.

Rezultatet e deritanishme të Manchester United nuk kanë qenë edhe aq të mira. Vetëm katër fitore në tetë xhirot e para të Premier Ligës, e kanë lënë prapa në tabelë skuadrën e Mourinhos.

Madje portugezi ua ka bërë me dije të gjithë lojtarëve se nuk janë të paprekshëm dhe se mund të përfundojnë në bankën e rezervistëve, ashtu siç po ndodh edhe me kapitenin Wayne Rooney, transmeton KosovaPress.

“Unë mendoj që të paprekshëm duhet të jenë shpirti i ekipit, angazhimi, krenaria, respekti për tifozët. Këto duhet të jenë të paprekura, e jo lojtarët”.

“Nga ta pres angazhim më të madh”, ka deklaruar Mourinho.

Ai gjithashtu ka bërë të ditur se Rooney do të ketë mundësi të tjera për të treguar se e meriton të jetë një prej titullarëve në ekipin e United.