Përfaqësuesja e Kosovës arriti të marrë një pikë në ndeshjen e parë kualifikuese në histori të cilën e zhvilloi ndaj Finlandës.

Një gol i Valon Berishës i siguroi një pikë Kosovës që nuk u tregua aspak inferiore, marrë parasysh që luante të parën ndeshje të këtij niveli.

Ky barazim nuk ka kaluar pa u vërejtur nga mediet botërore të cilat e kanë cilësuar si “pikë historike për Kosovën”, njofton Klan Kosova.

Mediumi britanik BBC i ka kushtuar një artikull kësaj ngjarje të cilin e ka titulluar “Pika e parë historike për Kosovën”,  ku vec komenteve për ndeshjen përmendet edhe e kaluara e vështirë nën okupimin serb.

Reuters artikullin për Kosovën e titulloi: “Shënon Berisha, në barazimin e parë kualifikues për Kosovën”, për të theksuar se zakonisht FIFA nuk lejon lojtarët të ndërrojnë përfaqësuese, por ka bërë përjashtim për Kosovën, si e sapopranuar.

Medie nordike Aftenbladet i ka thurur lavde golashënuesit kosovar pasi shkrimin dedikuar barazimit të Kosovës e ka titulluar: “Berisha historik, shënon golin e parë të Kosovës”.

“Valon Berisha nxjerr barazim me Finlandën në ndeshjen e parë zyrtare të Kosovës”, shkroi The Guardian, ndërsa Bild artikullin e ka titulluar: “Kosova barazon në ndeshjen e parë kualifikuese për Botëror”.