Nënkryetari i Kuvendit të Kosovës, Xhavit Haliti ka thënë se Kosova i ka kryer të gjitha obligimet sa i përket themelimit të Gjykatës Speciale derisa ka thënë se Brukselit i ka mbetur vetëm trajnimi i gjyqtarëve.

“Në Kosovë nuk ka ndonjë çështje të pazgjidhur. Deri tash të gjitha çështjet janë miratuar në Kuvend dhe janë dërguar në Bruksel. Tani ka mbetur që Brukseli të bëjë rekrutimin e gjyqtarëve”, ka thënë Haliti, për REL.

Nënkryetari i Kuvendit të Kosovës, Xhavit Haliti, tha se të gjitha veprimet për formimin e Gjykatës Speciale janë ndërmarrë, duke respektuar ligjet e Kosovës dhe rregulloret e veçanta.

Andaj, ka vijuar ai, nuk ka asnjë arsye që institucionet e Kosovës të mos bashkëpunojnë me këtë gjykatë.

Haliti tha se askush nuk e ka dëshiruar një gjykatë të tillë. Por, ai beson se puna e kësaj gjykate do të dëshmojë edhe një herë se lufta të UÇK-së ka qenë e pastër dhe e drejtë.