Dje, rreth orës 18:45 në rrugën Ponashec-Junik, në afërsi të urës së lumit Ereniku, lagja ‘Qestaj’, ka ndodhur një aksident trafiku me fatalitet, në të cilin ishte përfshir vetura e tip ‘VW Golf’ me ngjyrë të bardhë, targa të regjistrimit rajoni Pejë, i drejtuar nga i dyshimti B.Sh.(1971) shtetas shqiptar i Kosovës, dhe viktima këmbësor E.(T.) Q.(10.12.2009) shtetas shqiptar i Kosovës, banor i komunës së Junikut.

Aksidenti ka ndodhur deri sa i dyshimti ishte duke qarkulluar nga drejtimi i fshatit Ponashec në drejtim të Junikut. Me të arritur ne lagjen ‘Qestaj’, afër urës se Erenikut, nga krahu i djathtë i del viktima papritmas, fillon të kalojë në krahun e majtë dhe për shkak të afërsisë që e kishte i dyshimti me mjetin e tij, me pjesën e parë ballore e godet viktimën, të cilin e hedh për asfalt. Viktima pëson lëndime të rënda trupore, dërgohet në Spitalin e Përgjithshëm në Gjakovë për ndihmë mjekësore, por mjeku kujdestar konstaton vdekjen e tij.

Lidhur me rastin është njoftuar prokurori i shtetit dhe me urdhër të tij trupi i viktimës i lirohet familjarëve për ceremoni mortore. I dyshimti është arrestuar dhe ndaluar.

Rasti hetohet dhe procedohet nga njësia e hetimeve te aksidenteve NJRKRRT Pejë.