Policia e Kosovës deri në këto momente nuk ka informacione se ndonjë grup i dyshimtë të ketë kaluar kufirin për të hyrë në Maqedoni, ka njoftuar Zyra për Informim e Policisë së Kosovës.

Policia e Kosovës ka njoftuar se nëpërmjet autoriteteve maqedonase e ka pranuar informacionin lidhur me rastin e ndodhur në stacion policor në Goshincë të Komunës së Likovës.

“Departamenti i Policisë Kufitare ka planin operativ për mbulimin dhe kontrollin e vijës kufitare, duke përfshirë patrullimet e përbashkëta me zyrtarët kufitar të Maqedonisë dhe mund të konfirmojmë se gjatë realizimit të detyrave policore nuk është vërejtur asnjë element apo lëvizje e individëve apo grupeve të dyshuara nga Republika e Kosovës drejt Maqedonisë dhe anasjelltas”, thuhet në përgjigjen e Policisë së Kosovës.

Më tej, theksohet se Policia e Kosovës me zyrtarët e saj policor vazhdon realizimin e detyrave policore për menaxhimin dhe kontrollin kufitar, me qëllim të parandalimit të krimit trans-kufitar./Arbresh.info/