Instituti Hidrometeorologjik i Kosovës ka bërë parashikimin e motit për pesë ditët e javës së ardhshme. Sipas Institutit, vendi ynë vazhdon të mbetet nën ndikimin e masave të ngrohta të ajrit me presion të lartë atmosferik, çka do të thotë se edhe në javën e ardhshme do të kemi mot të ngrohtë e me diell.

“Temperaturat minimale do të lëvizin ndërmjet 6-9 gradë Celsius kurse maksimalet e ditës pritet të lëvizin ndërmjet 20-24 gradë Celsius. Do të fryjë erë nga drejtimi i juglindjes me shpejtësi 1-9m/s”, thuhet në komunikatën e IHMK-së.

Por, sipas IHMK-së, gjatë vikendit të javës së ardhshme, mund të ketë tendencë të ketë ç’rregullim të përkohshëm të motit dhe ulje të temperaturave maksimale, për shkak të fushave të ulëta barike dhe kushteve për reshje të shiut.