Lajmit për caktimin e datës 4 shtator 2016 për shenjtërimin e Nënë Terëzës, iu ka gëzuar edhe kryeministri i vendit, Isa Mustafa.

Sipas Mustafës, shenjtërimi i Nënë Terezës është vlerësim i merituar dhe nder i jashtëzakonshëm për popullin shqiptar.

Shihni të plotë postimin e Mustafës në Facebook:

Sot, është një ditë e shënuar për shqiptarët dhe për të gjithë njerëzit e vullnetit të mirë anekënd botës.

Miratimi nga Papa Françesku i dekretit përfundimtar për shenjtërimin e Nënës Terezë më 4 shtator 2016, është vlerësim i merituar për Nënën e madhe shqiptare, e njëkohësisht është nder i jashtëzakonshëm për popullin tonë.

Ne, sot, jemi krenarë që nga gjiri i popullit tonë doli Nëna Terezë, e cila me jetën, përkushtimin dhe sakrificën e saj mbresëlënëse, u bë simbol global i humanizmit dhe dashurisë për njeriun, u bë shenjtëreshë e botës mbarë.

T’i falemi Nënës tonë të madhe Gonxhe Bojaxhiut! IM