Juventusi ka siguruar përfundimisht shërbimet e Randal Kolo Muanit, pasi Paris Saint-Germain ka dhënë miratimin për transferimin e sulmuesit francez te skuadra bardhezi.

Klubi francez ishte i pari që zyrtarizoi marrëveshjen të shtunën në mbrëmje, duke konfirmuar rikthimin e 27-vjeçarit në Torino, ku ai kishte lënë përshtypje pozitive gjatë periudhës së kaluar.

Kolo Muani mbërriti në Torino të dielën në mëngjes dhe përfundoi me sukses vizitat mjekësore, përpara se të firmoste kontratën e re që do ta mbajë te Juventusi deri në verën e vitit 2031.

Ndryshe nga raportimet e mëhershme për një huazim, marrëveshja është një transferim i përhershëm. Juventusi do t’i paguajë PSG-së 50 milionë euro, prej të cilave 38 milionë janë shumë fikse, ndërsa 12 milionë euro të tjera janë të lidhura me bonuse.

Sulmuesi francez do të trashëgojë fanellën me numrin 9, e cila më parë mbahej nga Dusan Vlahović.

Kolo Muani do t’i bashkohet menjëherë skuadrës për turneun parasezonal në Hong Kong, ku Juventusi do të vazhdojë përgatitjet për sezonin e ri.

Sfida e parë e tij me fanellën bardhezi mund të vijë të mërkurën, në miqësoren ndaj Chelseat.