Kryeministri në detyrë, Albin Kurti, ka shprehur ngushëllime për vdekjen e akademikut Emin Riza, të cilin e ka vlerësuar si një nga studiuesit më të shquar të arkitekturës tradicionale dhe trashëgimisë kulturore.

Përmes një postimi, Kurti ka shkruar se lajmin për vdekjen e Rizës e ka marrë me pikëllim të thellë, duke theksuar kontributin e tij në studimin, dokumentimin, restaurimin dhe mbrojtjen e monumenteve të kulturës në Shqipëri dhe në trevat shqiptare.

Sipas Kurtit, Emin Riza, i cili ka lindur në Korçë në vitin 1937, ishte i biri i linguistit të njohur Selman Riza. Ai kishte përfunduar studimet për inxhinieri ndërtimi në Universitetin e Tiranës dhe pjesën më të madhe të karrierës profesionale e kishte zhvilluar në Institutin e Monumenteve.

Kurti ka vlerësuar edhe veprimtarinë shkencore të Rizës, duke theksuar se ai ishte autor i 18 monografive dhe më shumë se 100 artikujve shkencorë. Po ashtu, sipas tij, akademiku Emin Riza kishte dhënë kontribut të rëndësishëm në hartimin e legjislacionit për trashëgiminë kulturore në Shqipëri dhe Kosovë, si dhe në përgatitjen e dosjeve për qytetet e Gjirokastrës dhe Beratit për përfshirje në UNESCO.

“Për shumë breza studentësh, studiuesish dhe profesionistësh të fushave të trashëgimisë kulturore, Emin Riza ishte profesor dhe mentor, udhërrëfyes dhe burim i pashterrshëm i dijes së thellë, integritetit profesional, përkushtimit total dhe punës së palodhshme e konsistente”, ka shkruar Kurti.

Në fund, kryeministri në detyrë u ka shprehur ngushëllime familjes Riza, kolegëve, miqve dhe të afërmve të akademikut Emin Riza./Arbresh.info