Ministrja në detyrë e Mjedisit, Planifikimit Hapësinor dhe Infrastrukturës, Fitore Pacolli, i është përgjigjur nënkryetares së LDK-së, Hykmete Bajrami, pas kritikave për gjendjen në deponinë e Sferkës.

Pacolli ka deklaruar se Bajrami, në vend që të kritikojë Qeverinë, duhet t’i kërkojë përgjegjësi kryetarit të Komunës së Pejës, Gazmend Muhaxheri, duke thënë se deponia është nën menaxhimin e komunës.

Sipas saj, përpjekjet për ta lidhur gjendjen në deponi me proceset që po zhvillon Qeveria dhe Kompania për Menaxhimin e Deponive në Kosovë (KMDK) janë tentativa për të shmangur përgjegjësinë e menaxhimit aktual.

“Është fort e kollajshme që si një centrifugë të provosh ta shpërndash fajin tek ata që po përpiqen ta adresojnë këtë situatë, vetëm për ta mjegulluar përgjegjësinë për menaxhimin e kësaj deponie”, ka shkruar Pacolli.

Ajo ka shtuar se institucionet kanë ndërmarrë hapa drejt një zgjidhjeje të qëndrueshme për çështjen e deponisë së Sferkës./arbresh.info