Kryeministri në detyrë i Kosovës, Albin Kurti, ka pritur në takim komandantin e misionit të NATO-s në Kosovë, KFOR, gjeneralmajor Özkan Ulutaş.

Sipas njoftimit të Qeverisë në detyrë, takimi u zhvillua në ditën kur Komisioni Qendror i Zgjedhjeve certifikoi rezultatet përfundimtare të zgjedhjeve të parakohshme për Kuvendin e Kosovës.

Në fillim të takimit, gjeneralmajor Ulutaş e ka uruar Kurtin për fitoren në zgjedhjet e 7 qershorit.

Gjatë takimit janë diskutuar zhvillimet aktuale politike në vend, situata e sigurisë në Kosovë dhe rajon, si dhe bashkëpunimi ndërmjet institucioneve të Kosovës dhe KFOR-it.

Kurti dhe Ulutaş kanë vlerësuar rëndësinë e vazhdimit të angazhimit të përbashkët për ruajtjen e paqes, sigurisë dhe stabilitetit, si dhe për thellimin e mëtejshëm të bashkëpunimit ndërmjet institucioneve vendore dhe misionit të NATO-s në Kosovë./Arbresh.info