Këngëtarja me famë botërore Dua Lipa raportohet se ka paguar 5 mijë paund për banorët e Palermos, pasi një pjesë e vendasve shprehën pakënaqësinë e tyre për kufizimet dhe bllokimet e vendosura në qytet gjatë fundjavës së dasmës së saj me aktorin Callum Turner.

Çifti pritet të kurorëzojë dashurinë të shtunën, në kuadër të një feste madhështore treditore në Sicili, e cila nisi me një koktej mirëseardhjeje në Palazzo Valguarnera Gangi.

Sipas raportimeve, shuma prej 5 mijë paundësh është ndarë si kompensim për banorët që jetojnë pranë zonave ku janë rezervuar hapësira shtesë parkimi dhe ku janë vendosur masa të veçanta për organizimin e ceremonisë.

Pakënaqësitë e qytetarëve janë shfaqur edhe përmes grafiteve nëpër qytet. Një prej mesazheve të shkruara pranë sheshit Piazza Croce dei Vespri thoshte: “Palermo nuk është me qira”, ndërsa më vonë u fshi nga autoritetet.

Të premten, dhjetëra qytetarë u mblodhën në Piazza Sant’Anna me shpresën për të parë nga afër mbërritjen e çiftit dhe të të ftuarve, por policia i largoi nga zona për arsye sigurie. Disa banorë u ankuan se masat e marra ishin të tepruara dhe se qyteti ishte praktikisht i mbyllur për shkak të dasmës.

Edhe disa biznese lokale kanë shprehur pakënaqësi, pasi janë detyruar të mbyllen më herët në një nga netët më të frekuentuara të javës. Pronarët e lokaleve thonë se kufizimet kanë ndikuar drejtpërdrejt në aktivitetin e tyre ekonomik, raporton Dailynews,transmeton Arbresh.info

Ndërkohë, kryetari i bashkisë së Palermo, Roberto Lagalla, e ka mirëpritur zgjedhjen e qytetit për ceremoninë e çiftit, duke theksuar se ngjarje të tilla rrisin imazhin ndërkombëtar të Palermos dhe sjellin përfitime ekonomike për zonën.

Për sigurinë e dasmës janë angazhuar më shumë se 50 truproja nga Roma dhe Londra, ndërsa disa rrugë pranë vendeve ku po zhvillohen festimet janë mbyllur për qarkullim. Çifti po qëndron në hotelin luksoz Villa Igiea, ku raportohet se ka rezervuar një kat të tërë me suita me pamje nga Deti Tirren.