Kandidatja për deputete nga Lëvizja Vetëvendosje, Mimoza Kusari Lila, u pyet se a e mbështet LVV-ja projektin amerikan për gazin e lëngshëm natyror. Ajo tha se mbështesin gasifikimin e thëngjillit.

“Kosova si vendi i pestë në botë me rezerva të linjitit e shohim më të arsyeshme, sepse në situata të krizave, gjithmonë në momente kur ka ndërprerje të furnizimit, është më e sigurt që burimi i energjisë apo lënda e parë për atë projekt energjik të jetë në vendin ku janë impiantet”, tha ajo në Click.

Më tej, Kusari Lila shprehu skepticizmin në lidhje me gazin e lëngshëm natyror.

“Skepticizmi ynë ka qenë te transportimi, gjegjësisht te gazi i cili duhet prapë të transportohet dhe të sillet te gazsjellësi”, tha Kusari Lila.

Kur u pyet se a e kanë ende këtë skepticizëm, ajo u përgjigj:

“Mendoj që nuk ka vendim i cili mund të konfirmojë këtë projekt, por ka një vullnet dhe një interesim të lartë që me kompanitë amerikane të bashkëpunohet në gazifikimin e thëngjillit”, u shpreh ajo.