Çmimet e naftës në tregjet ndërkombëtare janë rritur ndjeshëm, duke arritur nivelin më të lartë që nga viti 2022, pas raportimeve se Shtetet e Bashkuara po shqyrtojnë opsione të reja ushtarake ndaj Iranit.

Sipas mediave ndërkombëtare, ushtria amerikane pritet të informojë presidentin Donald Trump mbi planet e mundshme për ndërhyrje, në një përpjekje për të zhbllokuar situatën e tensionuar me Teheranin.

Nafta Brent u rrit me afro 7%, duke kaluar përkohësisht mbi 126 dollarë për fuçi, përpara se të tërhiqej në rreth 114 dollarë gjatë së njëjtës ditë. Kjo luhatje lidhet pjesërisht edhe me skadimin e kontratave të tregtimit për muajin qershor.

Rritja e çmimeve vjen në një moment kur bisedimet për paqe duken të bllokuara dhe ngushtica strategjike e Hormuzit mbetet praktikisht e mbyllur. Përmes kësaj rruge kalon rreth 20% e naftës dhe gazit natyror të lëngshëm në botë, çka e bën situatën edhe më të ndjeshme për tregjet globale.

Konflikti ka ndikuar drejtpërdrejt në rritjen e çmimeve të energjisë dhe karburanteve. Në Mbretërinë e Bashkuar, çmimi i benzinës ka arritur mesatarisht 157 peni për litër, ndërsa nafta (diesel) 188.5 peni, duke shënuar rritje të konsiderueshme krahasuar me periudhën para nisjes së konfliktit.

Ekspertët paralajmërojnë se ndikimi nuk do të kufizohet vetëm te karburantet. Rritja e kostove të energjisë pritet të reflektohet edhe në çmimet e ushqimeve, transportit ajror dhe produkteve të përditshme, për shkak të zinxhirit të furnizimit.

Ndërkohë, raportime të tjera sugjerojnë se SHBA-të po shqyrtojnë edhe mundësinë e kontrollit të një pjese të ngushticës së Hormuzit për të rikthyer lëvizjen tregtare, ndërsa Irani ka paralajmëruar se do të mbrojë këtë rrugë strategjike dhe do të reagojë ndaj çdo kërcënimi.

Tensionet janë reflektuar edhe në tregjet financiare. Bursat në Azi u mbyllën në rënie, ndërsa tregjet evropiane shënuan rritje të moderuar.

Analistët theksojnë se nëse çmimi i naftës i afrohet ose tejkalon nivelin e 125 dollarëve për fuçi, rreziku për rritje të inflacionit global bëhet edhe më i lartë, duke shtuar pasigurinë ekonomike në muajt në vijim.