Vullkani Dempo në ishullin e Sumatrës Jugore të Indonezisë shpërtheu sot, duke hedhur një re hiri vullkanik deri në 3,500 metra mbi majën gati 3,200 metra të lartë, tha Qendra e Indonezisë për Vullkanologji dhe Zbutje të Rreziqeve Gjeologjike (PVMBG), raportoi Xinhua.

Drejtoresha në detyrë e PVMBG, Lana Saria, tha se shpërthimi u regjistrua në sizmografë në orën 11:45 të mëngjesit sipas kohës lokale, me një amplitudë maksimale prej 30 milimetrash dhe një kohëzgjatje prej afërsisht 13 minutash e 49 sekondash.

PVMBG tha se do të vazhdojë të monitorojë nga afër vullkanin dhe të ofrojë informacionin më të fundit, duke i bërë thirrje publikut të qëndrojë i qetë, vigjilent dhe të ndjekë udhëzimet zyrtare.

Qendra e Paralajmërimit për Hirin Vullkanik në Darvin (VAAC), bazuar në të dhënat satelitore dhe ato në terren, tha se vullkani hodhi hirin vullkanik në një lartësi prej rreth 6,700 metrash mbi nivelin e detit, me renë e hirit që lëvizte në verilindje me një shpejtësi prej rreth 9 kilometrash në orë.

Sipas ekspertëve, pritet që reja e hirit të zhduket brenda 6 deri në 12 orësh.

Shpërthimi i sotëm pasoi një shpërthim të mëparshëm frenatik të regjistruar më 7 prill, kur një re hiri arriti një lartësi prej rreth 2.5 kilometrash mbi majën e vullkanit, me depozitim lokal të hirit brenda një rrezeje prej disa kilometrash.

Autoritetet dhe shërbimet vullkanologjike vazhdojnë të monitorojnë situatën.