Kryeministri i vendit, Albin Kurti u shpreh “thellësisht i shqetësuar” në fillim të një mbledhjeje të qeverisë, ku foli për stërvitjet e ushtrisë serbe në afërsi të kufirit.

Ai tha se “institucionet e Kosovës mbeten vigjilente dhe të gatshme për t’u përballur me çdo kërcënim”, ndërsa shtoi se “është koha që komuniteti ndërkombëtar të ndëshkojë këtë qasje destabilizuese të Serbisë që kërcënon drejtpërdrejt sigurinë dhe paqen rajonale”.

Kurti tha se është “koha e fundit” që bota demokratike të “ndërmarrë hapa konkretë” edhe për mbrojtjen e shqiptarëve në Luginën e Preshevës, të cilëve u bëri thirrje që të mos bien pre e provokimeve.

“Këto provokime në afërsi të brezit kufitar në Karaçevë nga njësia e brigadës 63 e parashutistëve të Serbisë, përmes stërvitjeve me helikopterë H145M dhe kërcënimeve me parashutë disa metra larg kufirit me Republikën e Kosovës, përbëjnë një shfaqje të rrezikshme të agresionit. Kjo shfaqje bëhet edhe më alarmuese kur kujtojmë se e njëjta njësi ka trajnuar dhe mbështetur grupin e kriminelit Milan Radoiçiq, të cilët realizuan sulmin agresor e terrorist në fshatin Banjskë të Zveçanit, kur vranë rreshterin policor, Afrim Bunjakun – heroin e Kosovës”, tha ai.

Kurti tha se “këto lëvizje ushtarake, kombinuar me retorikën nxitëse të presidentit të Serbisë, Vuçiq, kinse Serbia po përgatitet për një sulm të mundshëm nga një aleancë Kroaci-Shqipëri-Kosovë, si dhe blerja e armatimit kinez dhe rus, konfirmojnë se Serbia po e përdor Rusinë si mjet shantazhi për ta mbajtur rajonin e Ballkanit nën tension të vazhdueshëm”.

Ai përmendi situatën aktuale të sigurisë në botë, që tha se është “tejet e brishtë”, ndërsa tha se Beogradi po e shfrytëzon këtë.

“Beogradi po e shfrytëzon këtë moment për ta sfiduar gatishmërinë e institucioneve vendore dhe ndërkombëtare të sigurisë dhe në përgjithësi stabilitetin e Ballkanit Perëndimor, sipas interesave të Serbisë dhe aleatëve të saj Rusisë dhe Iranit, që duan të kenë trazira, konflikte dhe paqëndrueshmëri gjithandej”.