Gjykata e Apelit e ka aprovuar pjesërisht si të bazuar ankesën e mbrojtjes së të akuzuarit Zhivojin Neshiq, duke ia ulur dënimin nga 15 në 13 vjet burgim për dhunim seksual gjatë luftës në Kosovë.

Sipas vendimit të Apelit, i akuzuari Zh.N, i shpallur fajtor për veprën penale “krime lufte kundër popullsisë civile” nga neni 142 lidhur me nenin 22 të Ligjit Penal të ish-Jugosllavisë, është dënuar me 13 vjet burgim, nga 15 vjet sa ishte dënuar në shkallën e parë. Në këtë dënim do të llogaritet edhe koha e kaluar në paraburgim që nga 4 marsi 2024.

Gjykata e Apelit ka hedhur si të palejuar ankesën e përfaqësueses së palës së dëmtuar, ndërsa pjesën tjetër të aktgjykimit të shkallës së parë e ka lënë të pandryshuar. Po ashtu, pjesa tjetër e ankesës së mbrojtjes është refuzuar si e pabazuar.

Gjykata Themelore në Prishtinë – Departamenti Special, me aktgjykimin e 17 qershorit 2025, e kishte shpallur fajtor Zh.N dhe e kishte dënuar me 15 vjet burgim për të njëjtën vepër penale.

Në arsyetimin e vendimit, Apeli ka vlerësuar se aktgjykimi i shkallës së parë nuk përmban shkelje esenciale të procedurës penale, duke theksuar se dispozitivi është i qartë, i kuptueshëm dhe në përputhje të plotë me arsyetimin.

Sipas Apelit, gjykata e shkallës së parë ka vërtetuar drejt dhe plotësisht gjendjen faktike, duke administruar provat në mënyrë të rregullt dhe duke i vlerësuar ato si veç e veç, ashtu edhe në ndërlidhje reciproke.

Po ashtu, është konstatuar se ligji penal është zbatuar drejt dhe se janë përmbushur të gjitha elementet përbërëse të veprës penale për të cilën i akuzuari është shpallur fajtor.

Megjithatë, kolegji gjykues ka vlerësuar se dënimi prej 13 vjetësh burgim është më proporcional me shkallën e fajësisë së të pandehurit, rrethanat konkrete të rastit dhe nevojën për të shprehur dënimin shoqëror ndaj shkeljeve të rënda të së drejtës ndërkombëtare humanitare.