FIFA nuk ka ndërmend të ndryshojë kalendarin e FIFA World Cup 2026, të shpallur në dhjetor, pavarësisht kërkesës së Federación de Fútbol de Irán që kombëtarja iraniane të zhvillojë ndeshjet e saj në Meksikë.

Burime nga FIFA konfirmuan për EFE se organizata është në kontakt të vazhdueshëm me të gjitha federatat pjesëmarrëse, përfshirë Iranin, për planifikimin e turneut, por pret që të gjitha skuadrat të respektojnë kalendarin e publikuar.

Ndërkohë, ambasada iraniane në Meksikë ka bërë të ditur se Federata iraniane është në negociata për të zhvendosur ndeshjet e grupit G në territorin meksikan. Sipas saj, kjo kërkesë lidhet me mungesën e bashkëpunimit nga ana e autoriteteve amerikane për çështjen e vizave dhe mbështetjes logjistike për kombëtaren iraniane.

Ambasadori iranian në Meksikë, Abolfazl Psedniddeh, deklaroi se SHBA nuk po ofron mbështetjen e nevojshme administrative dhe logjistike për përgatitjen e Iranit në prag të Botërorit. Ai sugjeroi që FIFA të ndërhyjë, në mënyrë që Irani të mund të marrë pjesë në turne duke zhvilluar ndeshjet në Meksikë.

“Ne jemi shumë të interesuar të marrim pjesë në Botëror, por mungon bashkëpunimi për vizat. Për ne, alternativa më e mirë është që ndeshjet të zhvillohen në Meksikë”, është shprehur ai.

Nga ana tjetër, ish-presidenti amerikan Donald Trump deklaroi se kombëtarja e Iranit është e mirëpritur në SHBA për Botërorin, por njëkohësisht sugjeroi që të mos marrë pjesë për “arsye sigurie”.

Irani bën pjesë në Grupin G së bashku me Belgjikën, Egjiptin dhe Zelandën e Re. Skuadra e drejtuar nga Amir Ghalenoei pritet të debutojë më 15 qershor ndaj Zelandës së Re në Inglewood, të përballet me Belgjikën më 21 qershor në të njëjtin qytet dhe të mbyllë fazën e grupeve më 26 qershor kundër Egjiptit në Seattle./Arbresh.info