Siria njoftoi këtë të dielë se kishte ndaluar një grup përgjegjës për sulmet e fundit me raketa ndaj aeroportit ushtarak Mezzeh në Damask, me hetuesit që gjurmuan armët deri tek Hezbollah i mbështetur nga Irani.

Ministria e Brendshme tha se njësitë e sigurisë arrestuan të gjithë anëtarët e grupit, i cili sipas saj kishte kryer disa goditje ndaj aeroportit gjatë muajve të fundit, pas vëzhgimit të vendeve të dyshuara të lëshimit në disa zona të kryeqytetit.

Reuters shkruan se sipas ministrisë, armët e përdorura në sulme e kishin origjinën nga Hezbollah në Liban, një aleat i ish-presidentit Bashar al-Assad që dikur kishte një prani të madhe ushtarake në Siri duke mbështetur ushtrinë e Assadit. Hezbollah i mohoi akuzat dhe tha se nuk ka asnjë aktivitet apo lidhje me ndonjë grup brenda Sirisë.

Autoritetet siriane thanë gjithashtu se sekuestruan një numër dronësh që grupi po përgatitej t’i përdorte në operacione të tjera.

Ministria tha vetëm se të ndaluarit kishin lidhje me “entitete të huaja” të paidentifikuara, pa përmendur Hezbollah apo Iranin.

Reuters raportoi në nëntor se Uashingtoni po planifikonte të krijonte një prani ushtarake në një bazë ajrore në Damask për të ndihmuar në realizimin e një pakti sigurie që po ndërmjetëson mes Sirisë dhe Izraelit. Qeveria e mohoi raportin.

Burime të sigurisë thonë se Hezbollah ka lënë pas rezerva armësh, përfshirë dronë, në disa pjesë të Sirisë pas tërheqjes së forcave të tij pas rrëzimit të regjimit të Assadit.