Drejtuesit e Liverpoolit po përballen me shqetësime serioze lidhur me gjendjen shëndetësore të Alexander Isak, pasi dyshohet se sulmuesi suedez ka pësuar një frakturë të rëndë në këmbë.

Isak u detyrua të largohej nga fusha i dëshpëruar gjatë fitores së shtunës ndaj Tottenhamit, teksa pamjet e tij treguan qartë dhimbje të mëdha. Fillimisht u përjashtua mundësia e një dëmtimi në gju, duke sjellë lehtësim të përkohshëm në kampin e “Reds”.

Megjithatë, sipas “Daily Mail”, drejtuesit e klubit tani besojnë se 25-vjeçari ka pësuar një frakturë në pjesën e poshtme të këmbës së majtë. Skanimet e kryera të dielën kanë përjashtuar çdo problem me ligamentet, por pretendohet se ekzaminimet e mëtejshme kanë zbuluar një frakturë.

Nëse konfirmohet zyrtarisht, lëndimi do ta mbajë Isakun jashtë fushave për një periudhë të gjatë, duke qenë një goditje e madhe për Liverpoolin.

Klubi pritet të dalë me një njoftim zyrtar në ditët në vijim për të sqaruar gjendjen e sulmuesit, i cili vlerësohet rreth 125 milionë paund.