Situata nga moti i keq në qarkun e Elbasanit dhe të Gjirokastrës duket se po shkon drejt përmirësimit. Në qarkun e Elbasanit, reshjet e shiut kanë vijuar me intensitet të ulët, ndërsa Emergjencat Civile në bashkitë e qarkut raportojnë se nuk ka problematika të evidentuara.

Lumi Shkumbin ka prurje mbi mesatare, por pa shkaktuar probleme përgjatë shtratit të tij. Ndërkohë, HEC-i i Banjës ka shtuar shkarkimet duke kaluar në 200 m³/sek, përveç prodhimit prej 100 m³/sek, pasi edhe Moglica ndodhet në kuota maksimale. Autoritetet bëjnë të ditur se situata do të analizohet në vijim.

Fushat e Sulovës, të cilat ndodhen në hartën e rrezikut në rast shkarkimesh nga HEC-i i Banjës, deri tani nuk rezultojnë të rrezikuara dhe nuk kanë shfaqur probleme me ujë apo përmbytje.

Edhe në qarkun e Gjirokastrës janë regjistruar reshje shiu zonale me intensitet të ulët, të shoqëruara me kthjellime. Njësitë vendore kanë vijuar punën për eliminimin e problemeve të evidentuara. OSHEE njofton se furnizimi me energji elektrike është i plotë në të gjithë qarkun. Niveli i lumit Vjosë është matur në 2.3 metra në Përmet dhe 3.5 metra në urën e Memaliajt.

Situata në bashki:

Libohovë: Aksi Suhë–Poliçan, në vendin e njohur si “Shkëmbi i Dallëndyshes”, është bërë i kalueshëm për automjetet. Po ashtu, vijon puna në aksin Sheper–Poliçan (njësia adm. Zagori), e cila do të vazhdojë edhe ditën e nesërme.

Dropull: Është vënë në funksion segmenti rrugor Glinë–Nepravishtë, duke mundësuar lëvizjen e mjeteve nga banorët e 6 fshatrave.

Gjirokastër: Në aksin Kolonjë–Golëm (njësia adm. Picar), punimet e rikonstruksionit kanë hasur bllokime të shpeshta për shkak të skarpatave malore të paqëndrueshme. Kontraktori është tërhequr përkohësisht, deri në përmirësimin e motit.

Situata në bashkitë e tjera të qarkut paraqitet e qetë.

/rtsh.al/