Policia e Shtetit ka nisur aksionet për zbardhjen e ngjarjes dhe identifikimin e autorëve të vrasjes së Gilmando Danit dhe plagosjes së efektivit të AMP-së, Muçi Shaljani (Sheqeri), rast ky i ndodhur më 12 nëntor në Rinas të Tiranës.

Gjatë një operacioni këtë të premte në fshatin Nikël në Rrethin e Krujës, është zbuluar një arsenal i konsiderueshëm armësh dhe municioni, i cili dyshohet të ketë lidhje me grupime kriminale aktive në zonë.

“Gjatë kontrolleve u zbulua një banesë në fshatin Zall, ku u gjetën: -3 kallëpë tritol; -12 granata dore sulmuese; -sasi lëndësh plasëse gati për shpërthim, të montuara me kapsolla detonatore, fitil zjarrpërcjellës dhe celularë(mina); -3 ndezës granatash, kapsolla detonatore dhe 5 celularë; -4 armë zjarri (2 automatikë dhe 2 pushkë), 8 krehra dhe pjesë armësh; -6000 fishekë të kalibrave të ndryshëm; -2 kg e 25 gramë Cannabis”, njofton policia.

Pronari i banesës, shtetasi Ylli Zalla, 48 vjeç, është shpallur në kërkim, ndërsa policia po punon intensivisht për kapjen e tij dhe për të zbardhur lidhjen e mundshme me ngjarjen e ndodhur te rrethrrotulli i Rinasit.

Operacioni, sipas Policisë, është ende në vijim në rrethin Krujë, në kuadër të punës intensive hetimore dhe operacionale, me objektiv zbardhjen e autorësisë dhe rrethanave të ngjarjes së datës 12.11.2025.