Kryeministri Edi Rama dhe homologia e tij italiane Giorgia Meloni kanë firmosur marrëveshjen dypalëshe mbi bashkëpunimin strategjik në fushat e kujdesit shëndetësor, energjisë, mjedisit, industrisë së sigurisë dhe mbrojtjes, menaxhimit të migracionit, arsimit, inovacionit, diasporës, transformimit ekonomik dhe rritjes së zgjuar.

Nëshkrimi i kësaj marrëveshje vjen pas takimit dypalësh të mbajtur në Romë në Villa Doria Pamphilj, mes kryeministrave Rama dhe Meloni.

Më herët kryeministri Rama u prit me ceremoni zyrtare nga kryeministrja italiane Giorgia Meloni, ndërsa pritet gjithashtu dhe mbajtja e samitit të parë ndërqeveritar mes dy vendeve.

Delegacioni shqiptar i cili shoqëron Kryeministrin Rama, përbëhet nga: Zv.kryeministrja dhe Ministrja e Infrastrukturës dhe Energjisë, Belinda Balluku; Ministrja për Evropën dhe Punët e Jashtme, Elisa Spiropali; Ministrja e Punëve të Brendshme, Albana Koçiu; Ministri i Financave Petrit Malaj; Drejtori i Përgjithshëm i Policisë së Shtetit, Ilir Proda; Ministri i Mbrojtjes, Pirro Vengu; Ministrja e Shëndetësisë dhe Mbrojtjes Sociale, Evis Sala; Ministrja e Ekonomisë dhe Inovacionit, Delina Ibrahimaj; Ministri i Turizmit, Kulturës dhe Sportit, Blendi Gonxhja.

Ndërsa delegacioni italian përbëhet nga Ministrat Tajani, Piantedosi, Nordio, Crosetto, Gilberto Pichetto Fratin, Giuli, Schillaci, Musumeci dhe Nënsekretarët Freni dhe Ferrante.