Inspektorati Policor i Kosovës (IPK) ka rekomanduar suspendimin e tre zyrtarëve policorë pas një incidenti në një lokal në fshatin Rigjevë, Komuna e Klinës.

Sipas njoftimit, dy zyrtarë dyshohet se kanë shtënë me armë, e cila mund të mos jetë armë zyrtare, ndërsa një rreshter, pronar i lokalit, dyshohet se ka penguar hetimin e IPK-së.

Hetuesit e IPK-së, në koordinim me prokurorinë, po vazhdojnë hetimet për të sqaruar të gjitha rrethanat e rastit.

“Nga hetimet e deritanishme të IPK-së dyshohet, se dy zyrtarët policorë kanë shtënë me armë që dyshohet të mos jetë armë zyrtare (në bazë të provave të gjetura në vendngjarje) dhe të njëjtit janë të dyshuar për veprën penale “Përdorim i armës”. Lidhur me rastin e njëjtë hetuesit e IPK-së kanë rekomanduar suspendimin edhe të një rreshteri policor të Stacionit Policor të Klinës pasi që i njëjti në cilësinë e pronarit të lokalit me veprimet e tij ka penguar hetimin zyrtar të IPK-së, duke ndikuar në zhvillimin e procedurave dhe mbledhjen e provave në vendin e ngjarjes dhe me këtë rast i njëjti është i dyshuar për veprën penale “Dhënia e ndihmës pas veprës penale”./Arbresh.info