Kryeministri  i Shqipërisë, Edi Rama zhvilloi një takim me një grup studentësh dhe pedagogësh nga Katedra Newrope e ETH Zurich (Zvicër).

Pas pesë ditësh udhëtimi nëpër Shqipëri, nga qytetet në bregdet, kantieret dhe peizazhet në transformim, studentët dhe pedagogët nga Katedra Newrope e ETH Zurich u takuan me Kryeministrin Rama në Qendrën për Hapje dhe Dialog (COD) në Tiranë.

Ata erdhën të frymëzuar, por edhe plot pyetje, mbi momentin aktual të zhvillimit të Shqipërisë, ekuilibrin mes lirisë dhe rregullimit dhe vizionin që udhëheq ndryshimet e vendit.

Takimi u kthye në një shkëmbim të hapur idesh me kryeministrin Rama, ku u fol për arkitekturën, planifikimin dhe marrëdhënien e ndërlikuar mes vizionit politik dhe dizajnit hapësinor.

Ky takim shënoi mbylljen e udhëtimit të tyre studimor me titull “Liria në fund të historisë”, një eksplorim mbi mënyrën se si transformimi i vazhdueshëm i Shqipërisë po krijon realitete të reja hapësinore e shoqërore, dhe rolin që arkitektura mund të luajë në to.

Katedra Newrope e ETH Zurich është një qendër e Arkitekturës dhe Transformimit Urban në departamentin e Arkitekturës të ETH Zurich, e cila merret me projektimin hapësinor dhe inovacionin social.

Katedra aplikon parimin e “Projektimit në Dialog” (Design in Dialogue) për të eksploruar Europën si një territor të ndarë, duke theksuar bashkëpunimin ndërdisiplinar për të adresuar sfidat komplekse të kohës sonë.