Kryetari i Kuvendit të Kosovës, Dimal Basha, ka shprehur pikëllim të thellë për ndarjen nga jeta të atdhetarit të njohur, ish-eprorit të Zonës Operative të Nerodimës dhe ish-kryetarit të OVL-UÇK-së në Ferizaj, Rafiz Sejdiu – Inxhinieri.

Basha tha se Rafiz Sejdiu ishte njeri i urtë, i vendosur dhe i pakompromis në vlera, që ruajti me dinjitet guximin, fisnikërinë dhe dashurinë për atdheun.

“Ai ishte njeri i urtë, i vendosur dhe i pakompromis në vlera, i cili përgjatë rrugës jetësore dinjitetshëm dhe me kujdes ruajti frymën burrërore, guximin, fisnikërinë dhe i qëndroi besnik atdheut në ditët më të vështira të tij. Kisha fatin ta njihja axhën Rafiz, i cili ishte mik dhe bashkëpunëtor i babait tim. Ikja në amshim e axhës Rafiz është një humbje e rëndë për vendin, prandaj në këto çaste të vështira, shpreh ngushëllimet më të sinqerta për familjen, miqtë, bashkëluftëtarët dhe të gjithë dashamirët e të ndjerit”, shkroi Basha./Arbresh.info